Wararka naga soo gaaraya degmada Xamar weyne ee magaalada Muqdisho, ayaa sheegaya in goordhow Qarax lagu dilay Xildhibaan katirsan Baarlamaanka Hirshabelle.

Xildhibaanka la dilay oo lagu magacaabi jiray, Cabdiweli Maxamed Ibraahin, ayaa xiliga la qarxinayay waxa uu marayay meel aan ka fogeyn Beerta nabad oo nawaaxigeeda ay buux dhaafiyeen Ciidamo katirsan Dowladda Somaliya.

Cabdiweli Maxamed Ibraahin, ayaa u geeriyooday qarax loogu xiray gaari yar oo nooca raaxada ah oo uu watay, Iyadoo aan la soo sheegin cid kale oo wax ku noqotay Qaraxa.

Gaariga Marxuumka, ayaa gabi ahaantiisaba gubtay, Maadaama qaraxa uu ahaa mid aad u culus, waxaana goobta tagay Ciidamo katirsan laamaha amniga oo sameeyay baaritaano, lama soo sheegin cid ay ku soo qabteen howlgalka.

Marxuumka Cabdiweli Maxamed Ibraahin, ayaa Nooqnaya Xildhibaankii u horeeyay ee katirsan Baarlamaanka Hirshabelle ee lagu dila Muqdisho, waana Xildhibaankii 4-aad oo katirsan Hirshabelle oo lagu dilo Qarax iyo weerar Toos ah oo lagu qaaday.

Saddexda kale, waxaa laba kamid ah lagu dilay Deegaano hoostaga Degmada Balcad Bishii Ramadaanka, Halka mid kalena lagu dilay wadada u dhexeysa Afgooye iyo Balidoogle.

Xildhibaanada Hirshabelle badankood waxey ku suganyihiin magaalada Muqidhso, kuwaasoo Caasimada u yimid arimo kala duwan maadaama ay galeen fasax laba bilood ah.