Ilaalada Doon laga leeyahay Hong Kong ayaa gar-gaar weydistay Markab Dagaal oo ku sugnaa Xeebaha Soomaaliya, kadib markii ay weerar kala kulmeen Koox katirsan Burcad Badeeda Soomaalida Galabkii Jimcaha.

Weerarkaan ayaa ka dhacay Biyaha Soomaaliya, waxaana Kooxdii Burcadda rasaaseeyay Markab Dagaal oo ku sugnaa Meel ka fog Biyaha Soomaaliya Masaafo ahaan 340 Nautical Miles.

Midowga Yurub ayaa sheegay in Hoos udhac uu ku yimid howlgalada Kooxaha Burcad Badeeda Soomaalida tan iyo Sanadkii 2017-kii oo ay dib usoo cusbooneysiiiyeen weeraradooda.

Markabka la yiraahdo MVSL oo kamid ah Maraakiibka ka howlgala Xeebaha Soomaaliya ayaa ka badbaadiyay Kooxdii Burcadda Ahayd in ay ku guuleystaan Afduubkii ay la damacsanaayeen Doonta laga leeyahay Hong Kong.

War kasoo baxay Midowga Yusug ayaa sidoo kale lagu sheegay in ay wali jirto Khatarta Kooxaha Burcad Badeeda Soomaalida inkastoo aan ahayn sidii hore.

Waxa ay tilmaameen in Marwaliba ay ka feejigan yihiin sidii ay ugu dib isugu soo abaabuli lahaayeen Kooxahaan oo Malaayiin Doollar horay ugu qaatay Maraakiib iyo Doomo ay qafaasheen.

Biyaha Soomaaliya waxaa ku sugan Maraakiib Dagaal oo badi ka socda Howlgalka Midowga Yurub, waxa ayna sheegaan Dowladaha ay ka socdaan in ay ilaaliyaan Isku socodka Ganacsiga Dalxiiska si aan Khatar ula kulmin.

Warbixino is xig-xigay oo kasoo baxay Midowga Yurub waxa ay horay ugu sheegeen in Wali aan lasoo gaba-gabeyn howlgalka ka dhanka Burcadda, balse ay hoos u dhacday Weeraradii ay qaadi jireen.