Senatarada Aqalka sare, iyo Guddoonkooda oo hortaagan Xaruntooda.

Kulan ay maanta yeesheen Guddiyada Joogtada Golaha Aqalka sare waxa ay kaga doodeen Waqtiga uu furmayo Kalfadhigooda 5-aad iyo Ajendayaasha la horgeynayo.

Dood dheer kadib waxa ay isku raaceen in fadhiga uu furmo 16-ka Bishaan Maarso 2019ka, si Golaha uu meelmariyo Ajendayaasha Horyaalla.

Senator Cabdikaafi Macalin Xasan Habdhowraha Golaha Aqalka sare oo shirkooda kadib la hadlay Warbaahinta ayaa sheegay in ay meelmariyeen qorshe howleedka Ajendayaasha sida loo kala hormarinayo.

Waxaa la wargeliyay Senatada ku maqan fasaxa in ay soo xaadiraan waqtiga furmashada Kalfadhigooda oo ku beegan Sabtida Todobaadka soo socda.

Golaha Aqalka sare ayaa fasax galay 10-kii Janaayo 2019 kadib markii loo xiray Kalfadhigii 4-aad ee Golaha.

Aqalka sare waxa uu matalaa Maamulka Goboleedyada, waxaana loo gudbiyaa Hindise sharciyeedyada Golaha Shacabka ay meel mariyaan kahor inta aan u gudbin Madaxweynaha Dowladda Federaalka oo ugu dambeyn kusoo saaro Digreeto ama Xeer Madaxweyne.