Ciidamada Booliska Dowladda Soomaaliya ayaa sheegay in ay Gobolka Shabeellaha hoose ku xir xireen 49 qof oo lagu tuhmayo in ay ka tirsanyihiin dhaq dhaqaaqa AL-shabaab.

Zakiya Xuseen oo ah Taliye ku xigeenka Booliska Soomaaliya ayaa sheegtay in 35 qof oo ka mid ah dadka la tuhmayo shalay lagu qabtay degmada Afgooye ee Gobolka Shabeellaha hoose.

Waxaa kale oo ay Zakiya sheegtay in 14 qof oo kali oo iyaguna la tuhmanayaal ah lagu qabtay degaanka Sabiid oo ay Ciidamada dowladda dhawaan kala wareegeen dhaq dhaqaaqa AL-shabaab.

Zakiya waxaa ay sheegtay in sidoo kale la qabtay Nin Qabiir ah oo AL-shabaab u qaabilsanaa qaraxyada dhejiska ah ee lagu xiro Gawaarida.

Dadka Rayidka ah ayey ugu baaqday in ay Gawaaridooda gaarka ah ilaashadaan si aan loogu xirin qaraxyada loo yaqaanno dhejiska.

Dhinaca kale Taliye Zakiya waxaa ay sheegtay in howlgallada dhinaca amaanka ah ay ku fidi doonaan Gobolka Shabeellaha hoose oo aysan ku ekaaneyn Magaalada Muqdisho.