Floribert Biyereke, Afhayeenka Ciidanka Burundi.

Dowladda Burundi ayaa shaacisay in ay xirtay Xafiisyada xuquuqda aadanaha ee hoostaga Qaramada Midoobey kuwaas o ka furnaa Afar magaalo oo ku yaalla dalka Burundi.

Arrintan ayaa daba socota iyada oo uu sii xumaanayo xiriirka Dalka Burundi iyo Hay’adaha Midowga Afrika iyo Qaramada Midoobey.

Go’aanka Burundi ay ku xirtay xafiisyadan ayaa la xiriira caro dowladda Burundi ay ka qaadday go’aanka Midowga Afrika iyo Qaramada Midoobey ay ku amreen Burundi in 1,000 ka mid ah Ciidankeeda jooga Soomaaliya ay la baxdo Bisha soo socota.

Dhamaadkii Bishii la soo dhaafay Dowladda Burundi ayaa sheegtay in Ciidankeeda jooga Soomaaliya aysan kun ka mid ah bixineyn iyada oo ku sifeysay cunaqabateyn la saarayo dalkeeda sidoo kalena ay tahay in waddamada ku jira AMISOM ay qeybsadaan tirada Ciidanka baxaya.

Go’aanka lagu saarayo Ciidanka Burundi ayaa la xiriira kaddib markii dowladda Madaxweyne Pierre Nkununziza, lagu eedeeyay in ay xadgudub ku sameysay xuquuqda aadanaha si xad ka bax ahna ula dhaqantay dadka mucaaridka ah.

Guddoomiyaha Midowga Afrika ayey dowladda Burundi ku eedeysay in uu xiriir wanaagsan la leeyahay xubnaha Mucaaridka ah ee jooga Adis ababa kuwaas oo ka shaqeynaya in xukuumadda Pierre Nkununziza meesha ka baxdo.

Xafiisyada Qaramada Midoobey laanteeda xuquuqda aadanaha ee la xiray waxaa ay ku kala yaallaan Caasimadda Bujumbura, Magaalada  Makamba oo ku taalla Koofurta Dalka iyo  labada magaalo ee kala ah Gitega iyo Ngozi oo ku yaalla dhinaca waqooyiga.